მარკეტინგი აცოცხლებს შენს ბრენდს
მუდმივად განვითარებად თანამედროვე სამყაროში მარკეტინგი ხელოვნებაა, რომელსაც შეუძლია შთაბეროს სული შენს ბიზნესს. ადამიანებს მარკეტინგის ცნება სხვადასხვაგვარად ესმით, სინამდვილეში მარკეტინგი გაცილებით დიდია, ვიდრე რეკლამა, პრომოუშენი ან გაყიდვებია. ისინი, რა თქმა უნდა, მარკეტინგის შემადგენელი ნაწილებია, თუმცა ჩემთვის მარკეტინგი არის კონკურენტულ ბაზარზე შენი უპირატესობა, სიცოცხლისუნარიანობის შენარჩუნება, სწორ დროს სწორი გადაწყვეტილებების მიღება, დიალოგი მომხმარებელთან და ორგანიზაციული კულტურა.
ამ დღეებში გაჟღერდა ასეთი კითხვა: ორგანიზაციული კულტურა ქმნის თანამშრომელს მის ნაწილად, თუ ადამიანები ქმნიან ორგანიზაციულ კულტურას? ბევრი მსჯელობის შემდეგ, მივდივართ იმ დასკვნამდე, რომელიც ძალიან ჰგავს ქათმისა და კვერცხის წარმოშობის დილემას – არავის აქვს ზუსტი პასუხი, ქათამი უფრო ადრე შეიქმნა თუ კვერცხი.
უამრავ სტატიას წააწყდებით, სადაც კარგად არის გაწერილი მარკეტინგის ფუნქციები, ორგანიზაციის სასარგებლოდ გადადგმული ნაბიჯები, მართვის პროცესი, მისი მომხმარებლის დაკმაყოფილების გზები, პროგნოზის გაკეთება, 3M და 5P მოდელი, რაც მნიშვნელოვანია და მარკეტერს ეხმარება სწორ დაგეგმვაში, მიზნების განსაზღვრასა და თანმიმდევრულობაში. ამ მეთოდებს ყველა უნივერსიტეტში ასწავლიან მომავალ მარკეტერებს, მაგრამ რა ქმნის წარმატებულ მარკეტერს, რომელსაც, თავის მხრივ, წარმატება მოაქვს თავისი კომპანიისთვის?!
მოდით შევთანხმდეთ, რომ ყველაფერი ფსიქო-პიროვნულ ფაქტორებზე დგას (თუ გინდათ არ შევთანხმდეთ). წარმატებას ქმნის ადამიანი და გუნდი, ვინც მარკეტინგს აკეთებს – თავის საქმეზე შეყვარებული, რისკიანი, შეუპოვარი, იდეების გენერატორი, რომელსაც შეუძლია ამ იდეების სისრულეში მოყვანა, რასაც აკეთებს ხარისხიანად აკეთებს, რომელმაც ზუსტად იცის, რა ტიპის მოთამაშეები (თანამშრომლები) სჭირდება გუნდში და შეუძლია მოიზიდოს კიდეც ისინი.
ჩემმა ფავორიტმა ლექტორმა ერთხელ გვითხრა, თუ თქვენს კომპანიაში მოვა ბუღალტერი და გეტყვით, რომ მარკეტინგში ხარჯია შესამცირებელი, სამსახურიდან გაუშვითო, რა თქმა უნდა, მან სტატისტიკით გაამყარა ეს წინადადება, რომელშიც ნაჩვენები იყო, როგორ „დაზოგეს“ დიდმა კომპანიებმა ფინანსები და როგორ უარყოფითად აისახა ეს მათი პროდუქციის გაყიდვებზე. მაშინვე ებრაული ანდაზა გამახსენდა და გადმოვაკეთე: იმდენი ბიუჯეტიც არ მაქვს, მარკეტინგში დავზოგოო!
მარკეტინგის გურუ ფილიპ კოტლერი, რომელმაც მარკეტინგის ფენომენი შექმნა და ამით, საფუძველი ჩაუყარა მარკეტინგულ აზროვნებას ჩვენს სამყაროში, თავად წერს სტატიაში, რომ ყველაფერი, რაც მანამდე უთქვამს, უკვე აღარ მუშაობს, უფრო მეტიც, გადახედვასა და განახლებას საჭიროებს.
ბუნებრივია, ეს განახლება ყველას თავისებურად ესმის, მრავალი ლიტერატურა შეგვიძლია მოვიშველიოთ, მაგრამ ძირითადი, რაზეც დღეს დგას ბრენდი და მარკეტინგი ეს არის ადამიანურობა, შენი კომპანია ზუსტად ისეთია, როგორიც შენ. შენი ორგანიზაციული კულტურა საუბრობს შენზე. ხარისხზე და ფასზე ხაზგასმით, დღეს, კონკურენტუნარიანი ვერ დარჩები, თუ ბრენდს არ ჩაბერავ სულს! უნდა იყო ხმა იმ მომხმარებლისთვის, ვისაც სჭირდება მისი გაგონება და ელის მას!..
დაბოლოს დაიმახსოვრეთ: If you play small, you stay small! Its’ okay to want more, do more – be more!