სტუდენტური კონფერენცია თემაზე: სამართლებრივი არაკეთილსინდისიერება სოციალურ მედიაში
2021 წლის 21 დეკემბერს, ალტერბრიჯის აკადემიური პერსონალისა და ადმინისტრაციული გუნდის ორგანიზებით გაიმართა პირველი სტუდენტური კონფერენცია თემაზე: სამართლებრივი არაკეთილსინდისიერება სოციალურ მედიაში. პანდემიასთან დაკავშირებული რეგულაციების გათვალისწინებით ღონისძიება ჰიბრიდულ ფორმატში ჩატარდა. მასში მონაწილეობა მიიღეს სტრატეგიული კომუნიკაციის სამაგისტრო პროგრამის პირველი და მეორე ნაკადის სტუდენტებმა, რომლებმაც ქართული და უცხოური პრაქტიკის მაგალითების მიხედვით წარადგინეს მოხსენებები შემდეგ საკითხებზე: არასათანადო განცხადებაზე დაფუძნებული PR-კამპანიისა და რეკლამის შედეგები; კონკურენტის სახელის არაკეთილსინდისიერი გამოყენება; Report სოციალურ მედიაში კონკურენტული უპირატესობის მოსაპოვებლად; სამართლის როლი სტრატეგიულ კომუნიკაციებში.
კონფერენციის მოდერატორები იყვნენ ალტერბრიჯის ვიცე რექტორი სტრატეგიული განვითარების მიმართულებით, სტრატეგიული კომუნიკაციის სამაგისტრო პროგრამის ხელმძღვანელი მაკო ჯაოშვილი და ამავე პროგრამის მარკეტინგისა და სამართლის სასწავლო კურსის ლექტორი სერგი ჯორბენაძე. მან დადებითად შეაფასა გამომსვლელთა ნაშრომები და ასევე უპასუხა პანელ-დისკუსიაში დასმულ შეკითხვებს ისეთ საკვანძო ასპექტებზე, როგორიცაა დეზინფორმაცია, „ფეიკ-ნიუსების“ გავრცელება, პერსონალური მონაცემების უსაფრთხოება. მსჯელობამ საკმაოდ ნაყოფიერად ჩაიარა. დამსწრე აუდიტორიამ გამოხატა ინტერესი გაზაფხულზე უფრო მასშტაბური სტუდენტური კონფერენციის ორგანიზების შესახებ.