ვთანხმდებით, რომ თანამედროვე სამყაროში მარკეტინგი და კომუნიკაცია ცოცხალი პროცესია, არ გააჩნია საზღვრები და საზრდოობს განვითარებით. სასურველი საკომუნიკაციო მიზნების მისაღწევად შექმნილია მარკეტინგის მიქსი – 7P, რომელიც შვიდი ყველაზე გააზრებადი და გამოყენებადი ელემენტისგან შედგება. თითოეული მათგანის გაძლიერებით ან შეცვლით, შესაძლოა განსხვავებულ აუდიტორიაზე წვდომა და კიდევ უფრო განსხვავებული სტრატეგია მივიღოთ. სტანდარტული მიქსი ასე გამოიყურება:
PRICE – ფასი
PLACE – ადგილი
PRODUCT – პროდუქტი
PROMOTION – პრომოუშენი/სტიმულირება
PEOPLE -ხალხი
PHYSICAL EVIDENCE – გარეგნული მახასიათებლები
PROCESS – პროცესი

ეს სიკეთეები წარმატების გარანტიას არ წარმოადგენს. აღნიშნულ მიქსს შესაძლოა ვუწოდოთ ეფექტური მარკეტინგული ინსტრუმენტების ნაკრები, თუმცა რეცეპტს რაღაც რომ აკლია – ფაქტია. ამ ფაქტზე განსაკუთრებით ბევრი კი, ჩვენი სფეროს გურუმ და dot.com ბიზნესის ექსპერტმა, სეტ გოდინმა იფიქრა. ჭეშმარიტება მალევე იშვა და მერვე პი, purple cow – ანუ „იისფერი ძროხა“ ეწოდა.

წიგნი, რომელიც ძროხების ნახირზე დაკვირვებისას აღმოჩენილი „მოწყენილობით“ იქნა შთაგონებული, განსაკუთრებულობის საფუძვლის, ცნების რაობისა და სტატუსის მიღწევის მეთოდების შესახებ გვიყვება.

ერთ-ერთი ოჯახური მოგზაურობისას, სეტმა აღმოაჩინა, რომ ფანჯრიდან დანახული ცხოველების გადაადგილება შთამბეჭდავი სანახაობა იყო, მაგრამ დროებით. ძროხა თავის არსით საკმაოდ მოსაწყენი, არამიმზიდველი და არაფრით გამორჩეულია. ლოგიკურია, რომ მისი ყურება სიამოვნებას ნაკლებად განიჭებთ. სამაგიეროდ, როგორი მოვლენა იქნებოდა „იისფერი ძროხის“ დანახვა? – შთამბეჭდავი, მიმზიდველი და ერთობ დასამახსოვრებელი.

ასე ხდება კომპანიების შემთხვევაშიც. სამომხარებლო ბაზარი საკმაოდ ფართო და მზარდია, ყველასთვის მოიძებნება ადგილი, თუმცა იქნებით ერთფეროვანი და უკვე ნაცად პრაქტიკას გამოიყენებთ, თუ ძირეული კვლევითა და საკომუნიკაციო სტრატეგიით იქცევით “იისფერ ძროხად” – ეს თქვენზეა დამოკიდებული.

თუ წიგნის სათაური და თავად პის დასახელებაც ორაზროვნად გეჩვენებათ და ვერანაირ ლოგიკურ ბმას ვერ ხედავთ ინსტრუმენტსა და იისფერ ძროხას შორის, თქვენ მარტო არ ხართ. ავტორის მიზანიც ეპატაჟური განცხადების გაკეთება იყო: „იისფერი ძროხის არსი მისი განსაკუთრებულობაა. სიტყვა „განსაკუთრებული“ P-თი რომ იწყებოდეს, ალბათ ძროხის იდეის გამოყენების გარეშეც იოლად გავიდოდით, მაგრამ რა გაეწყობა“.

წიგნი გვასწავლის, როგორ უნდა ვაწარმოოთ გამორჩეული მარკეტინგი, როგორია პროდუქტისა და მომსახურების შესამჩნევი კომპონენტების შექმნის ხელოვნება და რატომ არასდროს არ უნდა მოვექცეთ დაწესებულ ჩარჩოებში.

მომხარებელს უყვარს, ამახსოვრდება და აინტერესებს გამორჩეული ბრენდები, არატრადიციული მიდგომები, უშუალო კომუნიკაცია.
ნუ შეგეშინდებათ შექმნათ თქვენი იისფერი ძროხა, ერთი შეხედვით ყავისფერ სამყაროში. გახსოვდეთ, კომუნიკაციას არ აქვს საზღვრები. #იყავიალტერი #იყავიგანსხვავებული