„ალტერბრიჯისა“ და რადიო უცნობის ერთობლივი პროექტის ფარგლებში რუბრიკას „ალტერთემას“ უძღვება ალტერბრიჯის ვიცე-რექტორი, კომუნიკაციის ექსპერტი, ალტერბრიჯის უმაღლესი აკადემიური პროგრამების ხელმძღვანელი მაკო ჯაოშვილი, რომელიც მორიგ გადაცემაში გვესაუბრა თემაზე – თუ როგორ შეცვალა კოვიდმა საქმიანი ურთიერთობების ეტიკეტი და ფორმატი. 

მაკომ აღნიშნა, რომ კოვიდის პირობებში, რამდენადაც საქმიან ურთიერთობები ძირითადად ონლაინ ხორციელდება, აქცენტი კეთდება უფრო მეტად სახის გამომეტყველებაზე, ჟესტიკულაციაზე, ხმის ტემბრზე, საუბრის რიტმზე.

მნიშვნელოვანია, რომ დისტანციური მუშაობის ფორმატში მივაქციოთ ყურადღება, როგორ შეგვიძლია თანამოსაუბრისადმი ემპათიის გამოხატვა. ონლაინ ურთიერთობებში კიდევ უფრო ფასობს თანაგანცდის შეგრძნება. 

რაც შეეხება ზუმის პლატფორმით შეხვედრების ორგანიზებას, ამასაც გარკვეული დადებითი შედეგები მოჰყვა, ერთერთია, დროის დაზოგვა, რაც მაგალითად, ერთი ადგილიდან მეორეზე გადაადგილებისას გვჭირდებოდა.

ზუმით  ჩართვა საშუალებას იძლევა სხვადასხვა ქალაქებიდან და ზოგჯერ ქვეყნებიდანაც მარტივად განხორციელდეს კონტაქტი, მთავარია, ინტერნეტის უწყვეტი წვდომა.  ტრენერები, ლექტორები, ექსპერტები მანძილის სიშორის მიუხედავად მარტივად ეკონტაქტებიან აუდიტორიას, უფრო მეტიც, პროცესის მოდერაცია ისე მიმდინარეობს, რომ  ერთიანობა არ დაირღვეს.  წარმატებული მაგალითები  მაკომ ონლაინ სწავლების პირადი პრაქტიკითა და კოლეგებთან ურთიერთობის გამოცდილებით დაასაბუთა. 

მაკოს აზრით, ზუმში მუშაობისას რამდენიმე მნიშვნელოვანი უნარის გამყარებაც შესაძლებელია.  მიკროფონების ჩართვა-გამორთვის რეგულირება ხელს უწყობს მოსმენა-მოთმენის უნარ-ჩვევის გავარჯიშებას. Მონაწილეები ერთმანეთის დროსაც უფრო მეტად უფრთხილდებიან და ცდილობენ მოკლედ ჩამოაყალიბონ სათქმელი ან/და “ჩათში” მოიწერონ.