სიახლეები

უნივერსიტეტმა ალტერბრიჯმა და ამერიკის შეერთებულ შტატებში მოქმედმა საზოგადოებრივმა პლატფორმამ Georgian Spaces ურთიერთთანამშრომლობის მემორანდუმი გააფორმეს, რომლის მიზანია ამერიკაში მცხოვრები ქართველი ემიგრანტების თვითრეალიზაციის, კარიერული განვითარების და ეკონომიკური გაძლიერების ხელშეწყობა.

მემორანდუმის ფარგლებში მხარეები შეთანხმდნენ ერთობლივი საგანმანათლებლო და პრაქტიკულ საჭიროებებზე მორგებული ინიციატივების განხორციელებაზე, რომლებიც ემიგრანტებს მისცემს შესაძლებლობას გააზრებულად დაგეგმონ კარიერული განვითარება, დაიწყონ ან განავითარონ საკუთარი ბიზნესი აშშ-ში და გააძლიერონ ფინანსური დამოუკიდებლობა.

ურთიერთთანამშრომლობის პირველი ერთობლივი ინიციატივა გახდა პროექტი „ბიზნეს კონსულტანტი“, რომლის პრეზენტაცია 7 დეკემბერს ნიუ იორკში, სალონური შეხვედრების ფორმატში გაიმართა. შეხვედრაზე უნივერსიტეტ ალტერბრიჯის რექტორმა ნათია გოცაძემ და Georgian Spaces-ის დამფუძნებელმა ნანუკა თევზაძემ ისაუბრეს იმ საგანმანათლებლო შესაძლებლობებზე, რომლებიც ქართველ ემიგრანტებს სთავაზობს აკადემიურ სტანდარტებზე დაფუძნებულ და პრაქტიკულ შედეგებზე ორიენტირებულ განათლებას.

შეხვედრის ფარგლებში ჩატარებულმა გამოკითხვამ მკაფიოდ წარმოაჩინა მონაწილეთა ინტერესები და პრაქტიკული საჭიროებები, რის საფუძველზეც შეიქმნა ექვსთვიანი სასერტიფიკატო პროგრამა „US Small Business & Career Development Program“.

პროგრამა შედგება ოთხი მოდულისგან და მიზნად ისახავს, ქართველ ემიგრანტებს მისცეს ბიზნესისა და ფინანსების მართვის პრაქტიკული ცოდნა, სამართლებრივი და მენეჯერული ინსტრუმენტები, თანამედროვე მარკეტინგული უნარები და ხელოვნური ინტელექტის გამოყენების შესაძლებლობები, რაც მათ დაეხმარება მცირე და საშუალო ბიზნესის წარმატებით დაწყებასა და განვითარებაში აშშ-ის ბაზარზე.

პროგრამის სრული კურსის წარმატებით დასრულების შემდეგ გაიცემა უნივერსიტეტ ალტერბრიჯის სერტიფიკატი – „US Small Business & Career Development Certificate“, რომელიც იქნება დასტური იმისა, რომ მონაწილეს აქვს  აკადემიური მზაობა და პრაქტიკული კომპეტენციები ბიზნესისა და კარიერული განვითარების მიმართულებით.

პროექტი „ბიზნეს კონსულტანტი“ ამოქმედდება 2026 წლის მარტიდან.