ბლოგი

რაც მასობრივ კომუნიკაციაზე ჩავაბარე, ყველა ფიქრობს, რომ ჟურნალისტი უნდა გავხდე და მხოლოდ ამ სფეროს შესწავლა შეიძლება ამ პროგრამაზე. ადრე მიწევდა ახსნა, რომ ჟურნალისტიკასთან ერთად, შევისწავლი ყველა იმ ეტაპს, რასაც კომპანია გადის იდეიდან ბრენდის ჩამოყალიბებამდე. მაგრამ ახლა, მოკლე პასუხი მაქვს – მასობრივი კომუნიკაცია ჩემთვის 21-ე საუკუნის ჯადოსნური ჯოხია!

ყურადღება – თანამედროვეობის მთავარი ვალუტა 

ბოლო პერიოდში, ალბათ, გაგიგიათ ფრაზა: “ის კი არ იმარჯვებს, ვისაც მეტი ფული აქვს, არამედ ის, ვინც თავის სათქმელს ყველაზე ეფექტურად შეფუთავს“.  დღეს ყველაზე რთულია ყურადღების მიპყრობა, რადგან ინფორმაცია უამრავია და ყველგანაა. ტვინი იჭერს მთავარ Hook- ს, თუ ის საინტერესო ან კრეატიული არ არის, ჩათვალე, რაც არ უნდა კარგი პროდუქტი/სერვისი უნდა გქონდეს – პოტენციური მომხმარებელი დაკარგე.

სწორედ აქ შემოდის მარკეტინგის „მამა“, ფილიპ კოტლერი, რომელიც გვასწავლის, რომ მარკეტინგი პროდუქტის გაყიდვა კი არა, მომხმარებლისთვის ღირებულების მიწოდებაა. კოტლერის ფილოსოფიით, თუ შენს იდეას ისე „შეფუთავ“, რომ მასში ადამიანმა საკუთარი პრობლემის გადაჭრა დაინახოს, ბიუჯეტი მეორეხარისხოვანი ხდება. ეფექტური კომუნიკაცია ნიშნავს, რომ შენ ყიდი არა „რა“-ს, არამედ „რატომ“-ს. როცა მომხმარებელი ხედავს მისთვის ღირებულ შინაარსს, შენი Hook-ი ავტომატურად ხდება მისი ინტერესის საგანი.

პირველი შთაბეჭდილება და ნდობის მანდატი

მეორე მხრივ, ბრაიან თრეისი, გაყიდვების გურუ, ხაზს უსვამს „პირველი შთაბეჭდილების ძალას“. თრეისი ამბობს, რომ წარმატების 80% შენს პერსონალურ ბრენდსა და ნდობაზე გადის. მისი თქმით, შენ გაქვს მხოლოდ რამდენიმე წამი, რომ ადამიანს თავი მოაწონო. ეს ნიშნავს, რომ შენი Hook-ი არა მხოლოდ კრეატიული, არამედ სანდოც უნდა იყოს. სწორედ ეს არის „შეფუთვის“ ხელოვნება – ეს არის შენი პერსონალური ბრენდი, შენი ხმა და შენი თავდაჯერებულობა, რომელიც ნებისმიერ ფინანსურ რესურსზე ძვირია.

ამ ყველაფრის გათვალისწინებით, მასობრივი კომუნიკაცია ჩემთვის აღარ არის მხოლოდ აკადემიური პროგრამა ეს არის უნარი, დაინახო ის „უხილავი ძაფები“, რაც ადამიანებს იდეებთან, პროდუქტებთან და ერთმანეთთან აკავშირებს. როცა ფლობ ამ ინსტრუმენტებს, შენ ხდები არა მხოლოდ ინფორმაციის გადამცემი, არამედ გავლენის არქიტექტორი.

 მასობრივი კომუნიკაცია სწორედ ის „ჯადოსნური ჯოხია“, რომელიც გეხმარება, არ დაიკარგო საინფორმაციო ხმაურში, შექმნა შენი უნიკალური პერსონალური ბრენდი და შენი სათქმელი პირდაპირ ადრესატის გულამდე მიიტანო.

დღეს აღარ მიწევს ახსნა თუ რატომ არ ვარ მხოლოდ ჟურნალისტი. დღეს მე ვარ ადამიანი, რომელმაც იცის, როგორ აქციოს იდეა რეალობად და როგორ შეფუთოს ის ისე, რომ სამყარომ არა მხოლოდ დაინახოს, არამედ დაიჯეროს მისი.