სიახლეები

უნივერსიტეტი ალტერბრიჯი ევროკავშირის 2025 წლის ERASMUS+ CBHE (Capacity Building in Higher Education) კონკურსის გამარჯვებული გახდა.

პროექტი – „საქართველოს უმაღლესი საგანმანათლებლო დაწესებულებებში კვლევისა და ინოვაციების შესაძლებლობების გაძლიერება“ (ERIC-GE) – ხელს შეუწყობს საერთაშორისო თანამშრომლობისა და აკადემიური შესაძლებლობების გაფართოებას. საქართველოდან კონკურსში ხუთმა პროექტმა გაიმარჯვა, რომელთაგან სამი კოორდინატორის სტატუსით განხორციელდება.

კონსორციუმში ალტერბრიჯთან ერთად ჩართულია 5 უმაღლესი საგანმანათლებლო დაწესებულება საქართველოს, ხოლო 2, ევროპის მასშტაბით.

პროექტს კოორდინაციას გაუწევს საქართველოს ტექნიკური უნივერსიტეტის ინსტიტუტი “ტექინფორმი“, რომელიც ქართულ და ევროპულ პარტნიორ უნივერსიტეტებთან ერთად უზრუნველყოფს თანამედროვე სასწავლო კურსებისა და ინოვაციური საგანმანათლებლო პროგრამების დანერგვას.

პროექტი მნიშვნელოვან პლატფორმას წარმოადგენს კონსორციუმის მონაწილე უმაღლესი საგანმანათლებლო დაწესებულებებისათვის, აკადემიური პერსონალის კვლევითი პოტენციალის განსავითარებლად, ახალგაზრდა მკვლევრების მოსაზიდად და ევროპული სტანდარტების შესაბამისად კვლევითი საქმიანობის განსახორციელებლად.

პროექტი ითვალისწინებს კვლევით საქმიანობაში ინოვაციების დანერგვას, რაც თავის მხრივ, ხელს შეუწყობს კონსორციუმის წევრი საგანმანათლებლო დაწესებულებების, მათ შორის, ალტერბრიჯის კვლევითი ინფრასტრუქტურის განვითარებას და მნიშვნელოვან წვლილს შეიტანს აკადემიური პერსონალისა და სტუდენტების მოტივაციის გაძლიერებაში.